<p style="text-align: center;">༄༅།།སྒྲོལ་མ་ཉེར་གཅིག་ལ་སྐྱབས་གསོལ་བདུད་རྩིའི་མཆོད་ཡོན།</p><p style="text-align: center;">པོ་ཏཱ་ལ་ཡི་གནས་མཆོག་ན།།</p><p style="text-align: center;">ཏཾ་ཡིག་ལྗང་གུ་ལས་འཁྲུངས་ཤིང་།།</p><p style="text-align: center;">འོད་དཔག་མེད་ཀྱིས་དབུ་ལ་རྒྱན།།</p><p style="text-align: center;">དུས་གསུམ་སངས་རྒྱས་འཕྲིན་ལས་མ།།</p><p style="text-align: center;">སྒྲོལ་མ་འཁོར་བཅས་གཤེགས་སུ་གསོལ།།</p><p style="text-align: center;">ཉོན་མོངས་སྒྲིབ་པ་མཐུག་པོའི་ཀློང་དབྱིངས་ནས།།</p><p style="text-align: center;">རྣམ་རྟོག་སྤྲུལ་བ་རྒོད་པའི་རྐང་གཉིས་མི།།</p><p style="text-align: center;">རང་སྣང་མཐོ་བས་གོལ་བར་འཕྱན་གྱུར་བ།།</p><p style="text-align: center;">དེ་ལས་སྐྱོབས་ཤིག་སྒྲོལ་མ་མྱུར་དཔའ་མོ།།</p><p style="text-align: center;">འདས་པའི་ཉམས་མྱོང་བསགས་པའི་བློ་གྲོས་ལ།།</p><p style="text-align: center;">བདག་འཛིན་བློ་ཡི་བཟི་ཁ་རབ་བཙན་པས།།</p><p style="text-align: center;">གང་བྱས་ལས་ལ་བདེ་བ་རྙེད་དཀའ་བ།།</p><p style="text-align: center;">དགོངས་ནས་སྐྱོབས་ཤིག་ཟླ་བའི་མདངས་ལྡན་མ།།</p><p style="text-align: center;">རྙེད་བཀུར་དོན་ལ་རྔམ་པའི་སྡེར་ཁྱིམ་གྱིས།།</p><p style="text-align: center;">བརྩེ་བའི་རྨུ་ཐག་གཅོད་ལ་སྙིང་དཔའ་བ།།</p><p style="text-align: center;">མུན་པའི་འོབས་ན་འཛུམ་གྱིས་དགོད་པ་འདི།།</p><p style="text-align: center;">ད་ལྟ་སྐྱོབས་ཤིག་གསེར་གྱི་མདོག་ལྡན་མ།།</p><p style="text-align: center;">ཤེས་རབ་ཆེ་སྙམ་ཤེས་དམན་ལས་ལ་ཞུགས།།</p><p style="text-align: center;">ལྟར་སྣང་དོན་ལ་ཡང་དག་འཇོག་པ་ཡི།།</p><p style="text-align: center;">འཁྲུལ་འཛིན་བློ་ལ་ཞེན་པ་མ་ནུའི་བུ།།</p><p style="text-align: center;">ཉམ་ངའི་གཡེང་ལས་སྐྱོབས་ཤིག་གཙུག་ཏོར་མ།།</p><p style="text-align: center;">འཕགས་པའི་ནོར་བདུན་འཇིག་རྟེན་ནོར་དང་བརྗེ།།</p><p style="text-align: center;">སྣ་ཚོགས་བྱ་བྱེད་སྣ་མའི་མེ་ཏོག་བཞིན།།</p><p style="text-align: center;">ཉེ་བར་བསྒྱུར་བས་ལས་འབྲས་ནོགས་པར་བཏང་།།</p><p style="text-align: center;">རྨོངས་ལས་སྐྱོབས་ཤིག་ཧཱུཾ་སྒྲ་སྒྲོག་མཛད་མ།།</p><p style="text-align: center;">དགེ་སྡུག་ལས་ཀྱིས་བདེ་སྡུག་སྐྱེད་བྱེད་པའི།།</p><p style="text-align: center;">ལས་འབྲས་འཆད་པ་བླུན་པོར་མཐོང་བ་ཡི།།</p><p style="text-align: center;">རང་རློམ་མཁན་པོ་རང་ལམ་འཆོལ་བ་ལས།།</p><p style="text-align: center;">མྱུར་དུ་སྐྱོབས་ཤིག་འཇིག་རྟེན་གསུམ་རྒྱལ་མ།།</p><p style="text-align: center;">དགའ་རབ་དགའ་བའི་ལས་ལ་རབ་དགའ་བ།།</p><p style="text-align: center;">གཏན་བདེ་གཅོད་པའི་རྩ་བར་མ་མཐོང་བར།།</p><p style="text-align: center;">བཟའ་བཏུང་ཉིད་ཀྱིས་ཡིད་རབ་ཚིམ་པའི་འགྲོ།</p><p style="text-align: center;">ད་ལྟ་སྐྱོབས་ཤིག་རྒོལ་བ་འཇོམས་མཛད་མ།།</p><p style="text-align: center;">ཉམ་ཆུང་སྲོག་ལ་རྒོལ་བ་བདུད་པོའི་གཤིས།།</p><p style="text-align: center;">སྣ་བརྒྱའི་རོ་ལ་སྲེད་པ་བྱིས་པའི་སྤུན།།</p><p style="text-align: center;">གང་ཡང་མ་སྟོན་ཅི་ཡང་མི་ཤེས་པའི།།</p><p style="text-align: center;">འགྲོ་རྣམས་སྐྱོབས་ཤིག་ཁྲོ་གཉེར་ལྡན་མཛད་མ།།</p><p style="text-align: center;">ཡོད་ཡོད་འདྲ་བའི་འདི་སྣང་དངོས་པོ་ལ།།</p><p style="text-align: center;">བདག་འཛིན་བློ་ཡིས་དམ་དུ་འཁྱུད་པའི་མཐར།།</p><p style="text-align: center;">བདག་བས་གཞན་གྱི་དོན་ལ་རབ་རྨོངས་པས།།</p><p style="text-align: center;">བདག་འཛིན་ཆོད་ཅིག་དངོས་གྲུབ་མཆོག་སྩོལ་མ།།</p><p style="text-align: center;">སྣ་མང་སྤྲུལ་བས་སྙན་གྲགས་དོན་ལ་འབད།།</p><p style="text-align: center;">སྣ་ཚོགས་ལུས་ཀྱིས་འདོད་ཡོན་སྒྲུབ་ལ་བརྩོན།།</p><p style="text-align: center;">སྣ་གཅིག་མ་ཐོབ་ཉམ་ངའི་འཕྲང་དུ་ལུས།།</p><p style="text-align: center;">དེ་ལས་སྐྱོབས་ཤིག་མྱ་ངན་སེལ་མཛད་མ།།</p><p style="text-align: center;">རང་བདེ་བསྒྲུབས་མཐར་རང་ལུས་བརླག་པར་བྱེད།།</p><p style="text-align: center;">རང་དོན་བསྒྲུབས་མཐར་རང་འཁྲི་ཡལ་བར་བོར།།</p><p style="text-align: center;">རང་སེམས་འདི་ཡང་རང་ལ་མི་དབང་བས།།</p><p style="text-align: center;">དེ་ལས་སྐྱོབས་ཤིག་ཕོངས་པ་སེལ་མཛད་མ།།</p><p style="text-align: center;">རང་གི་ཚེ་འདི་ཀུན་ལས་རྒྱལ་འདོད་ནས།།</p><p style="text-align: center;">རང་སེམས་སྨྱོན་པའི་རྗེས་སུ་རྒྱུགས་རྒྱུགས་མཐར།།</p><p style="text-align: center;">རང་ཡང་འཆི་འཕོའི་ལམ་དུ་ཉེན་གྱུར་བ།།</p><p style="text-align: center;">མྱུར་དུ་སྐྱོབས་ཤིག་འོད་རབ་སྟེར་མཛད་མ།།</p><p style="text-align: center;">གཞན་དོན་སྒྲུབ་སྐད་རང་དོན་ཁོ་ནར་འབད།།</p><p style="text-align: center;">གཞན་བཀུར་ཆེ་སྐད་རང་བསྟོད་འབའ་ཞིག་གཉེར།།</p><p style="text-align: center;">གཞན་ཕན་རྫུ་ཡིས་གཞན་མགོ་སྐོར་སྙམ་པའི།།</p><p style="text-align: center;">འགྲོ་འདི་སྐྱོབས་ཤིག་དགྲ་ཡི་དཔུང་འཇོམས་མ།།</p><p style="text-align: center;">མཐུན་པའི་ཚེ་ན་ཕུགས་ཀྱི་ནོར་ཡང་སྟེར།།</p><p style="text-align: center;">འགལ་བའི་ཚེ་ན་གཅེས་པའི་སྲོག་ཀྱང་འཕྲོག།</p><p style="text-align: center;">དགའ་སྡུག་སོ་ན་མེད་པའི་ཅོལ་ཆུང་བ།།</p><p style="text-align: center;">དེ་ལས་སྐྱོབས་ཤིག་ཁྲོ་གཉེར་སྤྱན་མཛད་མ།།</p><p style="text-align: center;">རྒྱལ་བའི་བཀའ་ལ་དོགས་སློང་གཏམ་གྱིས་རྒྱགས།།</p><p style="text-align: center;">བླ་མའི་གསུང་ལ་དགག་བཞག་ཅི་རིགས་བྱེད།།</p><p style="text-align: center;">ཕ་མའི་ཚིག་ལ་ཡིན་མིན་རྩོད་པའི་བུ།།</p><p style="text-align: center;">དེ་ལས་སྐྱོབས་ཤིག་དགེ་ལེགས་ཞི་བ་མ།།</p><p style="text-align: center;">བག་མེད་ལོག་འཚོས་ཉིན་མཚན་འདའ་བ་དང་།།</p><p style="text-align: center;">བབ་ཅོལ་གཏམ་གྱིས་གཞན་སེམས་དཀྲུགས་ལ་དགའ།།</p><p style="text-align: center;">ཁྲེལ་དང་ངོ་ཚ་བྲལ་བའི་སྙིགས་མའི་འགྲོ།།</p><p style="text-align: center;">མྱུར་དུ་སྐྱོབས་ཤིག་ཆགས་པ་འཇོམས་མཛད་མ།།</p><p style="text-align: center;">དབུགས་ཤིག་ཆགས་ཚད་ཁ་ལ་ཟ་ཐབས་དང་་།།</p><p style="text-align: center;">སེམས་ལ་ཐོགས་ཚད་རང་ལ་ཐོབ་ཐབས་ཀྱི།།</p><p style="text-align: center;">འདོད་སྲེད་དགྲ་ཡིས་བསླུས་པའི་སྐྱེ་བོའི་ཚོགས།།</p><p style="text-align: center;">མྱུར་དུ་སྐྱོབས་ཤིག་འཇིག་རྟེན་གསུམ་གཡོ་མ།།</p><p style="text-align: center;">ཁ་ལ་ཡོང་ཚད་ཟ་ལ་རྔམ་པའི་མཐར།།</p><p style="text-align: center;">གཉན་རིམས་ནད་ཀྱི་འཇིགས་པས་གཙེས་པ་ན།།</p><p style="text-align: center;">འོད་དོད་ལས་གཞན་བྱ་ཐབས་ཟད་པའི་འགྲོ།།</p><p style="text-align: center;">མྱུར་དུ་སྐྱོབས་ཤིག་མ་ལུས་དུག་སེལ་མ།།</p><p style="text-align: center;">མི་འདོད་ནད་ཀྱི་ཟུག་ངུ་ཆེ་ན་འང་།།</p><p style="text-align: center;">ཉམ་ཆུང་སྲོག་ལ་གཟན་པའི་དོ་ཟླ་མིན།།</p><p style="text-align: center;">དེ་ཡི་འཇིགས་སྐྱོབས་ལས་འབྲས་ངེས་པ་ཡིན།།</p><p style="text-align: center;">དེ་ལ་གོམས་མཛོད་སྡུག་བསྔལ་སྲེག་བྱེད་མ།།</p><p style="text-align: center;">ནད་རིགས་བཞི་བརྒྱ་རྩ་བཞི་འབྱུང་བའི་རྒྱུ།།</p><p style="text-align: center;">འདོད་ཆགས་ཞེ་སྡང་གཏི་མུག་ལས་གཞན་མེད།།</p><p style="text-align: center;">འདི་ཉིད་ཡིན་ཕྱིན་འདི་ལ་ནན་ཏན་དགོས།།</p><p style="text-align: center;">དེ་དོན་སྟོན་མཛོད་རིམས་ནད་ཀུན་སེལ་མ།།</p><p style="text-align: center;">མི་མཐུན་རྒུད་པ་མ་ལུས་སེལ་བ་དང་།།</p><p style="text-align: center;">མཐུན་རྐྱེན་ལེགས་ཚོགས་ཆར་བཞིན་སྙིལ་མཛད་དེ།།</p><p style="text-align: center;">ས་སྟེང་སྐྱེ་འགྲོ་གཅིག་ལས་གཅིག་ཟ་བའི།།</p><p style="text-align: center;">འཇིགས་ལས་སྐྱོབས་ཤིག་གནོད་ཀུན་འཇོམས་མཛད་མ།།</p><p style="text-align: center;"> ཨ་རུ་རྣམ་རྒྱལ་གྱིས་འཕྲལ་མར་སྦྱར་བ་ཛ་ཡནྟུ།</p>