<h3 style="text-align: center;"><font color="#167efb"><b>བོད་ལ་ཡོད་པ་དྲང་བཤད། ཀ་རྩོམ།</b></font></h3><div style="text-align: center;"> རྩོམ་འབྲི་བ། གཉན་གངས་སྨྱུག </div><div><br></div><div>ཀ་མད་སུམ་ཅུའི་ཡིག་ངོ་མི་ཤེས་ཤིང་། །</div><div>ཁ་ནས་སྦྱོར་ཀློག་ཙམ་ཡང་མི་འཁྱོར་བའི། །</div><div>ག་ས་གང་གི་དྲྭ་ལམ་སོ་སོ་རུ། །</div><div>ང་ཁྱོད་རྩོད་པའི་མཁས་དབང་བོད་ལ་མང་། །</div><div><br></div><div>ཅ་ཀ་རྒྱུ་ནོར་མཁོ་དགུ་མི་ཚང་ཞིང་། །</div><div>ཆ་རྐྱེན་ཚང་བའི་འཚོ་ཆས་མེད་ན་ཡང་། །</div><div>ཇ་ཆང་བག་མེད་སྤོམ་སྐད་ཆེར་འདོན་པའི། །</div><div>ཉ་ཉོག་ཁྲོད་ཀྱི་ཚོང་དཔོན་བོད་ལ་མང་། །</div><div><br></div><div>ཏ་ཐ་ག་ལྟའི་དགོངས་དོན་མ་རྟོགས་ཤིང་། །</div><div>ཐ་སྙད་ཚིག་གི་བརྡ་ཙམ་མི་གོ་བའི། །</div><div>ད་ཏའི་དུས་ཀྱི་ཤེས་རབ་རྒྱས་སོ་སྐད། །</div><div>ན་ཚོད་དར་བབས་རྟོགས་སད་བོད་ལ་མང་། །</div><div><br></div><div>པ་ཊའི་རིས་ལྟར་རྙོག་འཛིང་ཆེ་དྲགས་པའི། །</div><div>ཕ་མཐའ་བྲལ་བའི་དུས་རབས་མདུན་སྐྱོད་ཁྲོད། །</div><div>བ་ཕྱུག་རྗེས་འགྲོ་རང་རིགས་སྤུན་ཟླ་ལ། །</div><div>མ་མོག་ངང་གི་གྲགས་ཅན་བོད་ལ་མང་། །</div><div><br></div><div>ཙ་ཙིར་སྐད་ངན་གང་སར་སྤུར་བཞིན་དུ། །</div><div>ཚ་གྲང་དཀའ་བ་ཅུང་ཟད་མི་བཟོད་ཀྱང་། །</div><div>ཛ་དྲག་ཅན་གྱི་དཀའ་རྙོག་གསལ་ཡོང་ཞེས། །</div><div>ཝ་སྐྱེས་ཆེ་རློམ་རླབས་ཆེན་བོད་ལ་མང་། །</div><div><br></div><div>ཞ་ཞུམ་ཕྱི་ཚུལ་ཞི་དུལ་རབ་ལྡན་ཡང་། །</div><div>ཟ་འདོད་ནང་གི་རྟོག་པ་ཆེར་རྒྱས་ཤིང་། །</div><div>འ་ཆད་འུ་ཐུག་ཕལ་ཆེར་མི་གཟིགས་པའི། །</div><div>ཡ་མཚན་ཆེ་བའི་བྱམས་ལྡན་བོད་ལ་མང་། །</div><div><br></div><div>ར་ལྟར་རང་སྣང་མཐོ་པོའི་ཁྲི་འཕང་ཐོག །</div><div>ལ་ལུང་སྐྱེ་བོ་ཀུན་ལ་འགྲན་འདོད་ཅིང་། །</div><div>ཤ་ཉེ་སྤུན་གྱི་ཁྲོད་དུ་ཆེས་ངར་བའི། །</div><div>ས་སྟེང་དཔའ་བོའི་དང་རྩེ་བོད་ལ་མང་། །</div><div><br></div><div>ཧ་ཅང་དྲང་པོར་སྨྲས་ན་མི་འདོད་པས། །</div><div>ཨ་ཁུ་བདག་ལ་རྒོལ་རྡུང་སྤྲད་སྲིད་ཀྱང་། །</div><div>ཧ་ཅང་རྫུ་འབག་གྱོན་ན་མི་ལེགས་ཕྱིར། །</div><div>ཨ་ཕོ་ང་ཡིས་དྲང་བཤད་བྱས་པ་ཡིན། །</div><div><br></div><div>ཧ་ཧ་ཧ་ཧ་ཧ་ཧ། ཀུ་རེ་དང་འབྲེལ་ནས་བྲིས། </div>