ལམ་སྟོན་གྱི་སྒྲོན་མེ།
དྭངས་གཙང་བློ་གསར་གཞོན་ནུའི་ཤོག་དཀར་ངོགས། །
ཤེས་རིག་སྣ་མང་ཚོན་གྱིས་བསྒྱུར་མཁས་ཤིང་། །
ཡ་རབས་ཀུན་སྤྱོད་བཟང་པོའི་སྣེ་ཁྲིད་པ། །
ཕན་བདེའི་ལམ་སྟོན་དགེ་རྒན་རྟག་ཏུ་གུས། །
______________________________ ལྡོང་སྙུག་རྩེན།
རེ་བ་དང་ཡིད་སྨོན་དུ་སིམ་པའི་སློབ་བུ་འདི་དག
སྨག་ནག་གི་པང་ནས་མཆོང་ལྡང་བྱེད་དུས་
ལམ་སྟོན་གྱི་སྒྲོན་མེ་ལྟ་བུ་ནི་དགེ་རྒན་རྐྱང་པ་ཡིན་
ལྷག་ཏུ་
བོད་ཚུགས་མ་ཡལ་བའི་དགེ་རྒན་ཁོ་ནར་དབང་པའི་རྒྱལ་ཁ་
ཡིན།
______________________________ཀར་སྦལ་མིག
རྒྱལ་ཕམ་འགྱུར་ལྡོག་ལྷས་མའི་འཇིག་རྟེན་གྱི།།
ཤེས་བྱ་རིག་པའི་གནས་ལ་དབང་འབྱོར་པའི།།
ཤེས་རིག་ནོར་གྱིས་གཏམས་པའི་དགེ་རྒན་ནི།།
ཡིད་ཀྱི་རྨོངས་མུན་སེལ་བའི་སྒྲོན་མེ་ཡིན།།
______________________________གཙང་སྨྱུག
རིག་པའི་གནས་མཁས་མཁྱེན་དཔྱོད་མཁའ་ལྟར་ཡངས༎
འཛུམ་ཞལ་སྒོར་མོ་སློབ་བུ་ཡོངས་ལ་འཁོར༎
ལེགས་པའི་ལམ་སྟོན་དགེ་རྒན་དམ་པ་ཁྱེད༎
མུན་གླིང་གསལ་བའི་སྒྲོན་མེ་ཅིས་མི་མཚུངས༎
______________________________རྩམ་ཟན་པས།
མུན་སེལ་ཤེས་རིག་གླིང་གི་འགྲན་ཁ་ན།།
མི་ཤེས་སྒོ་མོ་འབྱེད་པའི་ལམ་བཟང་ཞིག།
རིན་ཐང་གཞལ་དུ་མེད་པའི་བྱམས་སྐྱོང་སྟེ།།
མི་ཚེ་འདི་ཡི་སྙིང་པོ་ཁྱེད་ཉིད་ཡིན།།
_________________________________དྷཱིཿསྲས།
རྨོངས་པའི་གཉིད་ལས་དཀྲོགས་པའི་ཅོང་བརྡ།།
མ་རིག་མུན་པ་སེལ་བའི་སྒྲོན་མེ།།
རྡོག་ལམ་འོད་དུ་གསལ་བའི་ཉི་མ།།
དགེ་རྒན་དྲིན་ལ་གཞལ་མཐའ་མི་མངོན།།
___________________________རླུང་རྟ་ཡར་འགྲོ།
དགེ༵་བའི་ཆར་གྱིས་བརླན་པའི་མེ་ཏོག་རྩི། །
རྒ༵ན་གཞོན་བར་མའི་སྦྲང་བུ་ལེན་དུ་འཇུག །
བཀ༵འ་སློབ་གཡང་གི་འབྲི་མོའི་འོ་མའི་བཅུད། །
དྲི༵ན་གྱིས་སྐྱོང་བའི་ཚུལ་བཞིན་རབ་ལྡུག་པའི། །
ཆེ༵་མཆོག་དམ་པའི་སྐུ་ཚེ་རི་ལས་བརྟན། །
___________________________གཡང་དཀར་སྐྱབས།
མ་འོངས་ལམ་སྟོན་འོད་དཀར་སྒྲོན་མེ་དང་།།
རྨོངས་མུན་གཉིད་ལས་དཀྲོག་མཁན་ཅོང་བརྡ་སྟེ།
ས་སྟེང་འགྲོ་བའི་ལམ་སྟོན་དགེ་རྒན་ཚོར།།
ལྷད་མེད་སྙིང་ནས་བཀྲ་ཤིས་སྨོན་མདུན་ཞུ།།
____________________________ཁམས་འབྲི་སྲས།
ལམ་སྟོན་སྒྲོན་མེ་ཡི་གཟི་འོད་ཁྲོད་ན།།
བཅུ་ཕྲག་རིག་གཞུང་ལ་ཧུབ་ཀྱིས་འཐུང་བའི།།
གཟུར་གནས་བརྩོན་ལྡན་གྱི་སློབ་དཔོན་དམ་པ།།
དད་གསུམ་མེ་ཏོག་གི་མཆོད་འཕྲེང་འབུལ་ལོ།།
____________________________གངས་ཅན་པ།