<h3>ཟླ་བརྒྱད་པའི་ཕ་ཡུལ་དང་རང་ཉིད།</h3><h3><br /></h3><h3> མེ་སྲས། </h3><h3>ཟླ་བརྒྱད་པར</h3><h3>ངའི་རྨི་ལམ་གྱི་བྱེའུ་ཆུང་འཕུར་ཟིན། </h3><h3>བྱེའུ་ཆུང་འཕུར་ཤུལ་ན</h3><h3>དུད་ནག་གི་རྔམ་ཁ་ཤིན་དུ་རྒོད།</h3><h3>ས་རྡུལ་གྱིས་པདྨའི་ཁ་དོག་གཡོགས་ཤིང་།</h3><h3>ཆོས་ཉིད་ཀྱི་རླུང་བུ་ལྡང་མཚམས་བཞག</h3><h3><br /></h3><h3>ཟླ་བརྒྱད་པར</h3><h3>ངའི་ཕ་ཡུལ་གྱི་འཚོ་བ་རབ་ཏུ་འཁྱག </h3><h3>བསམ་གཞིག་གི་རི་མོ་བྲང་ཁ་རུ་བསྙེས་ཏེ་གཉིད་ལ་ཡུར། </h3><h3>འཇིག་རྟེན་ཁྲ་ཁྲ འཁོར་བ་སྡུག་བསྔལ། </h3><h3>ཡོད་ཚད་སྟོང་བ་ཉིད་དུ་སྒོམ་པའི་ཟོལ་གྱིས།</h3><h3>སད་ཐབས་མི་འདུག </h3><h3><br /></h3><h3>ཟླ་བརྒྱད་པར</h3><h3>ངའི་ད་དུང་ཁ་པར་འཆར་ངོས་ཀྱི་ལྷ་མོ་དེ་དྲན།</h3><h3>དཔེ་ཆ་བོར་བའི་ཉིན་ཞག་དུ་མར། </h3><h3>འཆི་གསོན་གང་གི་འདུ་ཤེས་དབེན། </h3><h3>རང་ལམ་རང་གིས་འཚོལ་བའི་སྐད་ཆ་རྫིག་པོ་ཞིག</h3><h3>རྒས་པོ་ཚོའི་འཕྲེང་བར་ན་བར་མ་ཆད་པར་བགྲངས། </h3><h3>ཀྭ་ཡེ ང་ལ་གཤོགས་པ་ཞིག་ཡོད་རྒྱུ་ན། </h3><h3>ཟླ་བརྒྱད་པའི་ལང་ཚོ་ཆུད་ཟོས་སུ་གཏོང་མི་སྲིད། </h3><h3><br /></h3><h3><br /></h3>