ཡུལ་ལ་བསྙེགས་སོང་།
རྩོམ་པ་པོ། མེ་རིའི་གཟི་འོད།
ཤོག་དཀར་མཐའ་མེད་ཐང་ཆེན་འདི་ཉིད།། མེ་རི་མཐུར་མེད་རྩེད་སའི་གནས་ཡིན།།
སྙན་ཚིག་པདྨའི་མགུལ་རྒྱན་བཏེགས་ཏེ།།
འཁྱུག་གིན་འཁྱུག་གིན་ཡུལ་ལ་བསྙེགས་སོང་།།
ཁྱད་མཚར་ཤེས་བྱའི་རྣམ་གྲངས་ཡོད་ཚད།།
མེ་རི་ནམ་མཁར་སྐྱོད་པའི་གཤོག་པ།།
མཛད་མེད་ཤེས་བྱའི་ལམ་ཆེན་བརྒལ་ཏེ།།
འཕུར་གྱིན་འཕུར་གྱིན་ཡུལ་ལ་བསྙེགས་སོང་།།
བདེན་པའི་ཀི་བསྭོའི་ངར་སྐད་ཡོད་ཚད།།
མེ་རི་རིང་དུ་བསྐྱོད་པའི་གོམ་འགྲོས།།
མི་ཁའི་རླུང་བུ་ཐོད་དུ་བརྒལ་ནས།།
དགོད་ཀྱིན་དགོད་ཀྱིན་ཡུལ་ལ་བསྙེགས་སོང་།།
ཕྲག་དོག་དུག་གི་སྨན་སྣའི་བཟི་ཁ།།
མེ་རི་མདུན་དུ་བསྐྱོད་པའི་ཐེམ་སྐས།།
ཕྱོགས་བཞིའི་གྲི་ཁ་རྣོན་པོའི་བར་ནས།།
འཛུམ་གྱིན་འཛུམ་གྱིན་ཡུལ་ལ་བསྙེགས་སོང་།།