8月15号，我和方之宏老师应邀参加了赵丽宏作品沪语朗读会，并用沪语朗读了赵丽宏作品《土地啊，土地》。<div> 赵丽宏的《土地啊，土地》，以质朴的文字书写土地的博大与厚重。土地默默孕育生命，承载岁月沧桑，既是生存的依托，也是乡愁与家国情怀的寄托。文章借土地抒发对故土的眷恋，告诉我们：人应当扎根大地，心怀对故土的感恩与敬畏。</div> <p class="ql-block">土地啊，土地（节选）</p><p class="ql-block"> 作者：赵丽宏 改写：顾 敏</p><p class="ql-block"> 朗读：杨敏芳 方之宏 </p><p class="ql-block"><br></p><p class="ql-block"> （女）世界浪最朴素个形象，是土地个形象。伊勿需要任何装饰，永远是迭能个浑厚博大，质朴自然。伊坦坦荡荡，襟怀磊落，静静个承载一切，默默个哺育一切，勿考虑回报个奉献一切。</p><p class="ql-block">（男）世界浪最丰富个色彩，是土地个色彩。我曾经一趟趟勒飞机浪俯瞰阿拉辽阔个国土，北方个黑土地、南方个红土地、西北个黄土地、长江、珠江两岸伊个永远拨葱茏个绿色覆盖个水乡泽国……</p><p class="ql-block">（女）还有伊些绵延无尽个群山搭仔丘陵，勒阳光个抚照下头，伊拉映射出了反差强烈个色泽，有辰光深沉得像蓝色个海水，有辰光柔和得像青翠个草地，有辰光又邪气耀眼，好比金黄色个火焰……</p><p class="ql-block">（男）从天浪鸟瞰大地，看到个是一片神奇美妙个仙境。但是搿仙境个主人就是阿拉搿些邪气普通个凡人。想到搿一点，就更加怀恋土地。</p><p class="ql-block">（女）是个呀，人类最深沉个感情，是对土地个感情。</p><p class="ql-block">（男）交关年数前头，当侵略者个铁蹄践踏中国个大好河山时，诗人艾青搿能写：“为啥我个眼睛里常含眼泪水？因为我对搿土地爱得深沉……”大半个世纪过去，现在再读搿两句诗，仍旧让人怦然心动。为啥？因为阿拉对土地个感情没变。老古话讲：“血土难离”，搿是发自肺腑个心声。</p><p class="ql-block">（女）勒国外旅游个辰光，我曾经看到过一位老华侨，勒伊屋里客厅个最醒目个地方，摆了只中国青花瓷坛，伊每日天侪要去摸一摸。我觉着奇怪。老华侨拿瓷坛个盖头开开来，我看见里向装了一捧黄颜色个泥土。伊讲“搿是我家乡个泥土。看到伊，我就想到家乡，想到我是一个中国人。”</p><p class="ql-block">（男）夜里做梦，我会回到家乡去，看到我熟悉个房子搭树，听鸡鸣狗吠，喜鹊勒屋顶浪勿停个唱……”老人讲搿些闲话个辰光，眼睛里有晶莹个眼泪。此情此景让我感动，也理解了老人个搿份恋土情结。看牢搿位动情个老华侨，我又想起了艾青个诗句：“为啥我个眼里常含眼泪水？因为我对搿土地爱得深沉……”</p><p class="ql-block">（女）对土地个感情，每个人大概侪会得有勿一样个经历搭体会。我个故乡勒长江入海口，中国个第三大岛崇明岛。老多年前头，作为一个下乡“知青”，我曾经勒崇明岛浪种过田。伊个辰光，天天搭烂泥打交道，劳动繁重，生活艰苦，但是呒没物事可以封锁我对家乡个憧憬、想象个思绪。</p><p class="ql-block">（男）崇明岛搭一般意义浪个岛勿一样，伊是由长江个泥沙沉积而成形成个，就凭搿一点，就为我个遐想提供了奇妙个基础。可以讲，崇明岛是长江个儿子，崇明岛浪个土地，集聚了阿拉祖国辽阔大地浪各种各样个泥土。</p><p class="ql-block">（女）我勒田野里做生活个辰光，凝视脚下头个土地，情勿自禁个想：搿一撮泥土，是从阿里搭来个呢？是唐古拉山，还是昆仑山？是天府之国个奇峰峻岭，还是神农架个深山老林？还是，险峻个三峡、雄奇个赤壁、秀丽个采石矶、苍凉个金陵古都呢……</p><p class="ql-block">（男）记得我曾经面对泥土遐想，写过一些诗：“故乡个泥土，汇集了华夏大地个缤纷七色，拿伊拉珍藏勒心里，我就拥有了整个中国……”。直到今朝，年轻时代个搿种遐想仍旧会让我个感情产生共鸣。</p><p class="ql-block">（女）是个呀！朋友，请记牢，侬个根勒土地之中。只有拿根深深扎进生侬养侬个土地，只有拿土地个色彩、气息珍藏勒心里，侬个生命搭人生之树再能</p><p class="ql-block">（合）枝繁叶茂，开花结果……</p>