<p class="ql-block">龙眼</p><p class="ql-block"> </p><p class="ql-block">海沧的所在，逐个社里计计有龙眼，伫厝边头尾、塍仔边、埕前厝后，一欉一欉伫遐伸枝展叶，遮天蔽日。</p><p class="ql-block"> </p><p class="ql-block">细汉的时阵，咱拢是勿会输树猴同款的囡仔，看着龙眼欉顶悬悬一捾一捾金黄金黄的龙眼，心内真煞痒。手䘼搝起来，骹手连捷，二三步半就上树顶，坐踮树桠仔所在，一手揪龙眼树枝，有时一手顺绁规㩝遏落去，有时数粒仔挽，有的时阵，就霸进前想卜规大桠共赚食落来，“咔嚓咔嚓”一声一声一直叫直危险。有时树枝会折，人会连枝带叶位龙眼欉顶头跋落塗骹，摔甲乌头面肿，一般是犹佫无事志，骹手犹会振动，惊人拌拌咧，照常佫徛起来，佫上树去挽，真好佳哉！揣一桗龙眼骹无日秋清的所在，共挽来遏来的龙眼囥踮骹边，一粒一粒剥皮吐核食甲真心适。</p><p class="ql-block"> </p><p class="ql-block">咱海沧人讲的“龙眼”，台罗拼音记作gîng‑gíng，漳厦泉三地的腔口差真济。漳州城内的人读音真各样，共阮的咬字差一截；泉州人是另一款腔调，念起来佮海沧话的韵味完全无仝，不而过无论啥物读音，都是乌作“龙眼”，讲起龙眼 gîng‑gíng，逐个人喙澜拢是想卜流。</p><p class="ql-block"> </p><p class="ql-block">品种嘛是千奇百怪，差真济。有的叫做「福眼」，粒头大，肉厚佫真有喙路，汁多，甜甲会煞喙；有的是「东璧」，粒较细，不而过肉肉佫较脆，核仔细细条；听讲佫有「乌龙眼」，熟了后外皮乌趖趖，肉色较深，甜甜带有点仔芳味。綹仔眼，细粒，勿会输綹仔，皮薄肉脆，较甜喙。品种大细粒差真济，味素也无仝，咱囡仔拢无拣，细汉时无通食，真枵鬼，啥物品种拢食甲会爽会畅就好。</p><p class="ql-block"> </p><p class="ql-block">龙眼的核，阮海沧人叫hut（核），有大有细。核细细一粒的而而，阮叫蛀核仔。福眼的核较大，东璧的核较细，佫有一种“白核龙眼”，核仔是白的，较软，食了核真好呸。咱食龙眼，拢是按时间顺序来，先食白核则佫食红核绁落食乌核的，愈来愈熟，愈食愈好料，感觉味素了了好，落尾后食到树欉顶无半粒无半项，就叫做“孤屈”——这就是阮所讲的“白核食遘红核，红核食遘乌核，乌核食遘孤屈”俗语由来</p><p class="ql-block"> </p><p class="ql-block">逐年旧历七月普度，龙眼熟的时阵，逐家逐户的埕内，石桌顶曝龙眼干。日大也著曝真久，佫惊否天落雨，曝真济日，龙眼肉就会缩甲甜甜韧韧，就是咱讲的“龙眼干”，只款官话号叫“桂圆”。寒天时煮龙眼干红枣汤，啉一喙，心肝头烧烧，骹手也烧烧。</p><p class="ql-block"> </p><p class="ql-block">海沧的龙眼gîng‑gíng/lîng‑gíng，无啥物稀奇，不而过伫咱的心内底，是细汉的滋味，是厝的气味，是通三都社里永久的光景佮回忆。</p><p class="ql-block"> </p><p class="ql-block">溪海宿士</p><p class="ql-block">2025.1.11</p>