<h1 style="text-align:center;"><br></h1><h1 style="text-align:center;"><span style="font-size:22px; color:rgb(22, 126, 251);">《風颱天》</span></h1><h1 style="text-align:center;"><span style="font-size:18px; color:rgb(22, 126, 251);"> 作者@邱碧華</span></h1><p class="ql-block" style="text-align:center;"><span style="color:rgb(176, 79, 187); font-size:18px;">诵读@白士敏</span></p><p class="ql-block" style="text-align:center;"><span style="color:rgb(22, 126, 251); font-size:18px;">采风@林开展</span></p><p class="ql-block"><br></p><h1> 「九月颱，無人知」，若講著風颱，就予我想起細漢的代誌。彼年可能是讀小學二、三年的時陣，電視報講有大風颱欲來，阿爸佮阿母攏足（真）緊張的，因為阮兜一爿是破草厝、一爿是瓦厝，早就離離落落矣。兩爿厝頂本來就𠢕漏雨，這馬閣有風颱來鬥鬧熱，當然是掣咧等。</h1><h1> 會記得彼工（日）的欲暗仔，阿母煮甲誠腥臊（好料），才拄喝食飯爾，阿爸就講：｢袂赴矣！｣叫逐家緊攢攢咧，講欲去覕風颱。阿母偝彼陣猶是幼嬰仔的外甥仔，我佮大姊、二姊、四姊，一人 幔一領雨幔，就緊出門走去三叔遐覕，留阿爸佮三兄顧厝。風雨真正愈來愈大，行到橋頂的時，阿母叫阮用爬的，才袂予風搧到溪仔底。行誠jiu才到三叔怹兜跤口，阮姊妹仔隨大聲喝：「三叔仔，緊開門喔！」一擺閣一擺，一直大聲喝，毋過內底的人，敢若攏無聽著。阮只好大力挵門，這陣才聽著三叔講風雨傷大，大門毋敢開開，愛阮踅去後尾門。誠無簡單爬到位，我的跤盤煞去予鐵線勾著，血流袂停，到今猶有一个疤。</h1><h1> 隔工（日）風颱走了後，阮一家伙隨轉（返）去厝，看阿爸走出走入，我隨綴去看，原來是斷去的煙筒管共灶跤的厝頂挵破一空，阿爸講好佳哉，昨暝走了緊，若無就害矣！尾手阿爸佮三兄共斷去的煙筒管扛去外口，閣爬去厝尾頂補厝瓦，原來囥佇厝後彼兩捆瓦片，就是這款時陣慾用的，莫怪阿母普通時就三叮嚀四吩咐，袂使去面頂𧿬踏。</h1><h1> 紲落來，阿公𤆬二姊去溪仔邊掠毛蟹，阿母𤆬四姊佮我去抾風拍筍，逐家攏足無閒，猶毋過嘛真歡喜，因為有幾若工（日）的腥臊（好料）通食。佇物資欠缺的年代，有通補喙空，就予人有一種幸福的感覺。 </h1><h1> 覕風颱這齣戲，一冬著愛搬幾若擺，一直到讀四年仔搬厝了後才結束。這馬想起來，袂輸咧搬電影仝款，遐爾仔刺激。逐擺講予囡聽，怹攏感覺誠好耍，我的心肝內煞有淡薄仔數念，嘛有淡薄仔稀微。</h1><p class="ql-block"><br></p><p class="ql-block">一一一一一一一一</p><p class="ql-block">注释</p><p class="ql-block">【瓦厝】hiā-tshù：瓦舍。用瓦片做為屋頂建築材料的磚造房子。</p><p class="ql-block">【腥臊】tshenn-tshau/tshinn-tshau：又唸作tshe-tshau。指菜色豐盛。</p><p class="ql-block">【偝】āinn/iāng：背。專指背人。</p><p class="ql-block">【搧】siàn：摑、甩、打。</p><p class="ql-block">【挵門】lòng mn̂g：叩門、敲門。</p><p class="ql-block">【跤盤】kha-puânn：腳背、腳面。</p><p class="ql-block">【煙筒管】ian-tâng-kóng：煙囪。</p><p class="ql-block">【𧿬踏】thún-ta̍h：不知珍惜的用腳踐踏。</p><p class="ql-block">【喙空】tshuì-khang：口腔、嘴巴。</p><p class="ql-block">【稀微】hi-bî：寂寞、寂寥。</p> <h1> 本文作者使用繁体字，若阅读不便，敬请原谅。(编者）</h1> <h1><span style="color:rgb(1, 1, 1);"> </span></h1><p class="ql-block"><span style="color:rgb(1, 1, 1); font-size:22px;">编后语： </span></p><h1><span style="color:rgb(1, 1, 1);"> 本篇闽南话散文由孙诗刚老师提供。</span></h1><h1><span style="color:rgb(1, 1, 1);"> 桦加沙席卷广东深圳沿海，当然也波及到厦门，此时，最好在家听莲花中学白士敏老师用乡音诵读《风台天》。</span></h1><p class="ql-block" style="text-align:center;"><span style="color:rgb(1, 1, 1);">厦门林开展</span></p><p class="ql-block" style="text-align:center;">2025年9月23日</p><p class="ql-block" style="text-align:center;"><br></p>