一起去睇世界既尽头

冬日的阳光

离上次欧洲之旅足足过咗六年，（第一次系自驾瑞士、南法）唔经唔觉又老咗六年，六年期间经历过我人生最灰暗既时刻，又经历咗三年不堪回首既疫情，一切都好似停顿咗咁，好开心走过咗哩段又活咗过嚟，人生最美既风景永远都系下一站，千帆过尽皆是客，洗尽铅华谁人知？ 第二次既欧洲之旅我地一齐走到世界既尽头，睇下一个最似月球既国度——冰岛。 每次欧洲申根签证都唔容易，准备一大堆既资料到排期历时两个几月，期间睇住机票价格日日咁上涨，心情就好似几十个吊桶咁七上八落，怪就怪国人护照既含金量太低，如果有百几个国家免签话走就走几好啊！好彩之前有过申根签记录，亦有过一d国外既旅游签证，记录良好，最终都可以成功拿下第二次申根签。 跟住就系plan行程、订机票、酒店、租车。万事俱备，只欠东风，冰岛无直航，只能绕道第三国，荷兰系我其中一个梦寐以求的梦幻国度，我选荷兰既阿姆斯特丹中转，顺便玩两日，回程由芬兰中转回国，响芬兰亦逗留玩下。点解会钟意荷兰？我其实钟意咗佢好耐了，因为荷兰最适合我哩种自由散漫毫无组织纪律性既人。 好多人觉得点解唔简冬季去冰岛？因为可以追极光嘛，其实我对极光都有执念，但系睇过好多攻略，冬天既冰岛直接劝退咗我，经常的暴风雪封路，天气恶劣，加上大风和极夜令出行处处风险同唔方便，所以仲系选择夏季去，极昼玩既时间又多，天气又好。 我要好好记录哩次难忘既旅程…… 我地终于出发了，多哈转机阿姆斯特丹，八个钟到多哈，再坐6个钟到阿姆斯特丹。我地简卡塔尔航空，试一下哩间比较闻名既五星级航空公司，事实体验就系飞机餐不要好食太多，不过成机都系黑鬼同焗到你晕既古龙水，哈哈😂 多哈机场非常大，（出发时以为多哈机场大，回程时先知自己系井底蛙，原来土耳其既伊斯坦布尔机场比多哈仲大，无法想象）到登机口要坐类似地铁既轻轨先可以到达，而且分多个区，各类餐饮、奢侈品牌林立，我转机既登机口仲有个热带雨林人造既景区供旅客休息、影相，不过商品无论汇率同价格都无咩优势，所以都系逛下，视频只拍到冰山一角。机场虽大，但标志清晰，很丝滑就能稳到自己既登机口。 飞行14小时，加转机4个钟，共18个钟终于抵达我既梦想国度荷兰首都Amsterdam,一夜未眠，腿都坐到水肿了。 逛咗一日Amsterdam，游咗该游的运河，逛咗花市，基本了解晒哩个城市的全貌，夜幕下运河两岸的Amsterdam处处弥漫住大麻的味道，充斥着sex的商店满大街都是，由于游人如织，大街随处都可见烟头，大麻同性交易既合法化感觉亦无带俾哩座城市既混乱，相反觉得治安尚可，就是游人有d多。游完阿姆斯特丹的运河后仲系好怀念瑞士的湖。 今日逛梵高博物馆，睇到很多真迹，睇翻自己装出一副好认真好懂个样，真系忍俊不禁，装逼装出新高度，其实我一d都唔懂。 花卉市场色彩斑斓 夜幕下既Amsterdam到处弥漫着大麻的味道，运河两岸随处可见sex既橱窗。 打卡网红雪糕同薯条，让旅程唔留遗憾，排队半个钟，妹妹纯粹为了摆拍到雪糕都化了，仲未成片，自己就试咗两淡，全部我包揽，咁唔系害我咩？明知我雪糕、薯条大忌。 今日自驾游两个村庄——羊角村、风车村。来回差唔多三百多公里，荷兰的高速路车虽多，但无论高速或国度路况都非常好，并且全程高速唔收费，哩点特别抵赞[强]道路平整无坑洼，沿途又养眼，牧场、绿化、村庄、风车尽收眼底，路牌标识清晰好辨认，唯一吐槽点系限速一时100、80、70、50，就没限速120的，我知道超速会面临高昂罚单，罚到你怀疑人生，所以一路都小心翼翼，开到好攰。羊角村其实系个水乡，村就建响纵横交错的河道里，每间屋都俾各种绣球花同绿化包围，村外原来湖面非常宽阔，有人玩起了风帆，游村最佳方式系座船。离开羊角村来到另一风格既风车村，期间由于走错咗一段路，导致到达时已经开始日落，但响日落既余辉映衬下风车村反而更靓，塞翁失马焉知非福，所有的安排都是最好的。今日终于如愿睇到荷兰大风车，摄影技术有限，现场真的俾我渣渣的摄影技术好睇百倍…… 夕阳的余晖好似向湖面镀咗层黄金。 夕阳映衬下既风车村显得安逸、宁静 阿姆斯特丹游玩咗两日，乘座冰岛既航空公司play，终于进入北极圈了，抵达世界的尽头，一个最似月球的地方。 选择哩家当地既两大租车公司之一租车，冰岛路况复杂，果断仲系简四驱，哩台RAV4同国内仲系有d唔同，根本听唔到发动机声音，我仲以为台车着唔到火去问工作人员，佢一定以为我系白痴，明明着咗车仲问，帅哥好耐心。 提车马上去超市补给，食咗咁多餐西餐迫切要医下个中国胃，听讲冰岛既羊排好正，一定要试试，事实证明真系好好味！ 欧洲绝大部份国家都系直饮水，冰岛亦唔例外，响水龙头直接接嚟饮就得了，不过个人感觉冰岛既水质更多负离子同活性，口感有点清甜，芬兰既水明显无咁好饮，但你千企咪接热水饮，一定要接冷水，供水唔同，热水有D硫磺味，系唔可以饮既，西人无论天气几冻都要加D冰，同我地中医相违背，又好奇怪食咗咁多西餐上火既嘢一D都唔觉得热气，唔通系同水有关？我记得第一次响瑞士个餐厅要水饮时，服务员就系直接响水龙头接俾我，我当时都唔敢饮，自己买依云水。 今日响雷克雅未克 Reykjavík市区一天，标志性建筑—哈尔格林姆教堂 抵达当天就蓝天白云，但今日乌云密布，冰岛的天气多变，时晴时阴时雨，又是极昼又是极夜，所以系抑郁症高发地。 北冰洋的风吹到嘴都歪，可想而知冬季天气何等恶劣，人都吹得走啊。 特约宁湖The Unknown Bureaucrat好多海鸥、天鹅同鸭子🦆 湖边留个影，扮到好cool 咁 湖边的鸭列队欢迎我 午餐面包羊肉汤系当地特色非常美味，羊肉汤可以免费续 晚餐的龙虾肉质非常鲜甜弹口，比国内既龙虾好食多了，系咪因为北冰洋既水特别冻特别纯净既原因呢？龙虾既做法亦值得称赞，搭配的面包配上佢特有既蒜蓉酱非常香脆可口，餐厅环境优雅、安静、浪漫🌹我认为可以超过米其林标准，回味无穷。由于太好食了，搞到回程翻雷市时又再食多咗次，唔理得咁多了，翻嚟吃土先算啦哈哈😂 今日正式进入冰岛的心脏地带黄金圈环岛，蓝色秘境瀑布系小众景点，旅行团一般不来，蓝色的水影起相真系好靓 黄金瀑布很壮观 小情人晕车，颈椎又话唔舒服，依家d后生都系娇生惯养，唔挨得 徒步羽毛峡谷 晚上入住Selfoss小镇上既哩家酒店窗外就系牧场，靓到好似一幅画咁。 今日前往黄金圈VIK维克小镇，沿途一路瀑布，都各具特色，Selialandsfoss塞里雅兰瀑布远睇一D都唔起眼，我甚至提唔起兴趣，睇完先知道错，瀑布是冰川的融水从高处飞流而下，落差相当大，原来顺住小路绕到瀑布里面先系最精彩，好似水帘洞般震撼真系令人叹为观止。 第二个景点实行将cool装到底，飞机残骸拍拍拍，睇相你一定无法想象现场环境，风大到～吹到我鼻水都出嚟了仲要扮cool，真系好冻～ 一秒俾你感受下冰岛既风，哩个只系常态，还有更大的风感觉真系轻D都会吹飞 离开飞机残骸又到另一个景点—斯科加瀑布Skogafoss又叫彩虹瀑布，佢系冰岛境内规模最大的瀑布之一，在阳光照射下经常有彩虹出现，可惜今日天阴。 迪霍拉里海岬Dytholaey是一个狭长的半岛海岸线，可以远眺黑沙滩，夏季可以观赏冰岛的国鸟—海鹦，但今日又系由于落雨睇唔到。 点知临走时雨停咗，太阳一出嚟一条彩虹🌈就横跨我面前出现，从来都未试过彩虹离我咁近，真lucky! 驱车去黑沙滩，D 沙真系黑既 真系有种世界尽头既感觉 尽显世界尽头的荒凉 纪录一下人生第一次，从来未换过备胎既我今日第一次换胎，学多d总无坏处。换备用胎同车行沟通，最后修理厂将漏气胎取走，半小时补好送过来，有惊无险，经过今次再出国自驾更加从容了 今日睇既苔原地貌系一种生长响极寒地方既植物，置身当中犹如置身月球的感觉，苔原是自然保护区，只能响外面拍摄，唔可以走入去，冰岛保护自然环境做得很好，现场无工作人员，亦无收门票，只有警示牌，但个个游客都好自觉唔会践踏禁区。 驱车冰河湖，嚟到哩道睇到冰川个一刻我真系词穷无法用言语形容，太壮观了，哩道既冰川依家因为全球变暖，已经越来越少，沉响水下系好多冰块，听游船既美女介绍哩道以前全部系冰川，比依家睇到既要多得多，救救地球吧。 响冰河湖食既午餐，龙虾热狗同龙虾汤，虽然系快餐形式，但都好美味，当然价钱都好美丽😂冰岛的食物绝对令我肥咗几斤，餐餐不同美食，胃口又好。 冰河湖俾我感觉好似一下子去咗北极咁，简直就系冰河世纪。 游完冰河湖去到南部另一处景点钻石沙滩，到处都系几卡拉既钻石，你可以随便执 晶莹通透的冰块真的犹如钻石一般 往东部所有的风光地貌与西部不同，风景都响路上，右边是延绵的海岸线和湖泊，左边是山峡，经过哩片湖泊发现大量的天鹅响哩道栖息，忍唔住停车又拍一烂餐。 打卡蝙蝠山，拍个倒影 今日路程有D远，开咗五个钟，途中嚟哩家泡咗个温泉，一扫满身的疲惫，哩家温泉沿著湖而建，与湖光山色连为一体 目前气温系4度，湖水冰冷入骨，名副其实既冰火两重天 北欧的冰岛物价一言难尽，但无论餐厅或酒店的用餐环境都无一间我稳到可以吐糟的地方，窗外唔系对住湖、冰川雪山、就系对住一望无际既牧场，咁既用餐环境会令你食欲大增，有时不知不觉食多咗都唔知，图片哩间只系咁多晚入住既其中一间。 今日向住北部进发，米湖地区的地热系一种自然现象，神奇的大自然，真正的温泉，徒步一片陨石区，仿佛行走月球上，睇既黛提瀑布Dettifoss系欧洲水量最大的瀑布之一，睇瀑布已经有D审美疲劳了，下午最重头系响胡萨维克镇Husavik 坐大飞响北冰洋追鲸🐳今日天气同运气同样好，一次睇到两条鲸，晚上响冰岛第二大城市阿克雷里入住，哩座响雪山下既城市夜景非常美丽，晚饭后忍唔住响城市对面的湖边坐住发呆。 仿佛在月球上行走 阿克雷里湖边停靠既船 阿克雷里系冰岛第二大城市，连红绿灯都系心型，特别浪漫🌹 响雪山映衬下既阿克雷里夜景摄人心魂，晚饭后坐响湖边对住哩座城市发呆，久久不愿离去… 冰岛环岛最后一日既行程依然丰富、紧凑，徒步草帽山天气好到爆。 心心念念既红黑教堂终于一睹庐山真面目 同陪伴我多日既小毛驴RAV4留个念，哩台车个人感觉唔系咁好开，反而无荷兰租既福克斯好开，冰岛租车唔平，可以选择既唔多，车行最常见既车型系RAV4了。 黑教堂今日有人举办婚礼入唔到去了 岩石形成既断桥，往下睇就系万丈深渊，好危险，本人有d畏高，加上风好大，真系怕企唔稳吹咗落去，匆匆摆拍完 好多海鸥响崖下栖息 黑沙滩睇海豹，海豹慵懒咁躺响岩石上晒太阳，游客虽多但个个都非常默契鸦雀无声，静静咁观看、拍照，哩个响国内系无法想象既。 seal好似完全唔知道咁多人围观佢咁，你有你睇，佢有佢晒太阳，偶尔翻个身同你对视确认下眼神又训翻落去。 环岛一周后再次翻到雷克雅未克，。火红既晚霞底下既哈尔格林姆教堂显得分外妖艳 今日系响冰岛既最后一晚，晚饭后就开车去租车公司还车，一路上睇到最近报道既火山爆发，又一自然奇观，冰岛火山爆发比较频繁，市民都已经习以为常了，有个项目系坐直升机近距离观看火山爆发。我地无安排 外国既月亮无特别圆，但冰岛既月亮系特别低特别大，可能同纬度高有关吧，再见了冰岛，佢既自然景观、地貌将会永远留系我既记忆里，我应该唔会再嚟第二次了，若干年后再睇翻自己当年写既美篇同曾经拍过既照片、回忆经历一定会好有意思，回味无穷。 视频完美纪录低冰岛最后一日既行程，草帽山、红黑教堂、断桥，海豹沙滩，填满了一天既行程 纪念一下租车小票，仲系有D小贵 离开冰岛飞行3.5小时到达欧洲旅程既最后一站芬兰首都—赫尔辛基，机场到达后接驳火车去市中心，火车站好干净，原来芬兰既官方语言系芬兰语同瑞典语，完全听唔明up咩，连报站都系芬兰语。火车可以上单车、上狗，出入站完全没人验票全凭自觉，人的素质国内无法比拟。 响芬兰食咗餐中餐，都几好食，酸菜鱼算几正宗了，牛肉亦唔错，四个菜埋单为八百几人民币，习惯咗北欧既消费人都麻木了，消费比冰岛平少少，冰岛更贵，人家食餐饭一百几十欧好平常，就等于我地既一百几十人仔一样。所以我地离发达国家仲差好远，几时人民币汇率坚挺我就话你叻了，吹牛对我地既生活无任何改变同帮助。 赫尔辛基好细，唔使租车随便闲逛都好方便，貌似有地铁，但都无坐，打卡两家教堂，shopping ，时间充裕，最悠闲既一日。 行个公园留个影，哩道气温好舒适，你可以短袖加个外套又得，直接短袖都OK，系世界上最宜居既城市之一，圣诞节既圣诞老人村一定好靓，平时亦就一座现代化城市而已，无咩古迹亦无咩历史，除咗退税高d外又唔系旅游城市。 芬兰都有好多湖泊，但水质感觉无冰岛、瑞士纯净，佢都系直饮水，但口感一般，无冰岛好。 草莓系好细粒既，唔知甜唔甜，无试，国内既草莓好大粒，系品种唔同定系国内既系转基因？ 下午茶妹妹话打卡哩家店，话唔知边个明星拍戏就响哩家店道拍既，明星个名我完全唔识，鬼知系咩明星，老人家完全唔同频道。 望住街景饮个下午茶感觉好写意，有d昏昏欲睡既感觉，哩D先系生活，慢节奏。 D鬼真系好中意甜品同饮料，餐餐落order 都问你要饮D咩？要咩甜品？肥死。 响街边饮杯嘢食个甜品好有欧洲feel 欧洲既电车系一大特色 连街头卖唱都感觉咁悦耳动听，如果我卖唱稳唔稳到D欧元呢？😂 街道唔平整，全部用哩种砖一块块铺，很怀旧 15日既欧洲之旅已经全部完满结束，游记到咗收尾，非常难忘冰岛既环岛之旅（其实每一段旅程我都会难忘😂因为旅游已经系我生活既一部份亦系我生活既动力，我热爱旅游。）还咗多年既心愿，见到唔一样既风光、地貌，一睹从小梦幻既理想国度—荷兰🇳🇱。我既愿望系睇尽人间美景，会唔会有D大贪呢？又有几多人做得到呢？总之，个人感觉冰岛好值得嚟一次，又好好玩。游记用粤语写，因为我中意我既母语中意我既方言，有睇唔明既地方可以学习，可以问我，有问必答。