<p class="ql-block">དྲང་གཏམ་ཚིག་གི་རྔ་སྒྲ།</p><p class="ql-block">---------ཅོ་ཚེ་གྲུབ་ཀྱིས།</p><p class="ql-block">ལུང་སྟོང་ནང་ལ་མདའ་ཞིག་འཕངས་ནས།།</p><p class="ql-block">རི་སྤྱང་རྒོད་པོའི་སྙིང་ལ་ཕོག་སོང་།།</p><p class="ql-block">སྙིང་རྩ་དམར་བོའི་ན་ཟུག་མ་བཟོད།།</p><p class="ql-block">རྫ་མགོར་རྒྱུགས་ནས་ལུག་ཁྱུ་གཏོར་སོང་།།</p><p class="ql-block">དྲང་གཏམ་གཡང་གི་མདའ་དར་བཟུང་ནས།།</p><p class="ql-block">ཁྲོམ་པའི་ཚོམས་ལ་གཡང་སྐོར་རྒྱག་དུས།།</p><p class="ql-block">འདམ་ཆུའི་ནང་གི་སྦལ་བ་ལྕོང་མོས།།</p><p class="ql-block">སྙིང་གི་མ་བཟོད་འཕག་འཚག་བྱས་སོང་།།</p><p class="ql-block">དྲང་སྲོང་བཟོད་པས་དཀའ་ཐུབ་སྤྱད་ནས།།</p><p class="ql-block">ཏིང་འཛིན་ཟས་ཀྱི་འཚོ་བཅུད་རོལ་དུས།།</p><p class="ql-block">ལང་ཀའི་རྒྱལ་བོ་དོགས་པ་སྐྱེས་ནས།།</p><p class="ql-block">གྲི་རིང་བཟུང་ནས་མདུན་དུ་ཐོན་བྱུང་།།</p><p class="ql-block">ཁྲ་ཡག་རྫ་མགོའི་ནོར་གནག་རྗེས་སུ།།</p><p class="ql-block">རྫི་བོ་གཞོན་ནུའི་གླུ་སྐད་གྱེར་དུས།།</p><p class="ql-block">རོང་བ་རྒན་མོའི་རྣ་ལ་མ་སྙན།།</p><p class="ql-block">མིག་ལོག་བར་ནས་སྡིགས་དམོད་བཏང་བྱུང་།།</p><p class="ql-block">ཁ་སང་བཤད་པ་ང་ཡི་མ་བརྗེད།།</p><p class="ql-block">དེ་རིང་ལབ་པ་སེམས་སུ་ཉར་ཡོད།།</p><p class="ql-block">ནངས་པ་སྐྱ་རེངས་མ་ཤར་གོང་ལ།།</p><p class="ql-block">ལྷ་བསང་བཏང་ནས་གཉན་ལ་ཞུས་ཆོག།</p><p class="ql-block">མ་གསང་དྲང་གཏམ་གཞན་ལ་མ་ལབ།།</p><p class="ql-block">གབ་ཚིག་ཅིག་གི་ཁུངས་སུ་སྦ་ནས།།</p><p class="ql-block">སྨྲ་མཁན་ནེ་ཙོར་སྐད་ཅིག་གཏོང་བ།།</p><p class="ql-block">ནེ་ཙོས་མ་ཤེས་ཁྲོམ་ལ་བཀྲམ་སོང་།།</p><p class="ql-block">སྤྱི་ལོ ༢༠༡༨ལོའི་ཟླ ༨ པའི་ཚེས ༨ ཉིན།</p>