<p class="ql-block">ཤིས་ཚིག་དབྱངས་ཀྱི་མཆོད་པ།</p><p class="ql-block">——གཞས་ཚིག</p><p class="ql-block">ཤར་རི་རྒྱལ་ལྷུན་པོའི་རི་རྩེ་ནས།།</p><p class="ql-block">གསེར་ཁྲི་གདུགས་ཉི་མའི་ཟེར་གྱི་མདངས།།</p><p class="ql-block">འོད་གླིང་བཞིའི་མུན་པ་གསལ་ལེ་འཆར།།</p><p class="ql-block">རྗེ་དྲིན་ཅན་བླ་མའི་གཟི་བྱིན་རེད།།</p><p class="ql-block">དབྱར་ཟླ་གསུམ་མེ་ཏོག་མཛེས་ཀྱིས་རྒྱན།།</p><p class="ql-block">བྱ་ཁུ་ལོའི་དྲུག་འགྱུར་སྙན་ཞིང་འཇེབས།།</p><p class="ql-block">མ་སེམས་ཅན་སྙན་དབང་གསོས་པའི་སྨན།།</p><p class="ql-block">མགོན་བླ་མ་ཁོང་གིས་ཆོས་སྒྲ་རེད།།</p><p class="ql-block">ལྷའི་ཁང་བཟང་རྣམ་པར་རྒྱལ་བྱེད་དེར།།</p><p class="ql-block">ཡུལ་ཆོས་དཔལ་ཞིང་ན་བཞེངས་སུ་བསྐྲུན།།</p><p class="ql-block">གྲྭ་སློབ་གཉེར་མང་བོའི་དགོན་གནས་གྱུར།།</p><p class="ql-block">ཕ་བླ་མ་དཀར་པོའི་ཐུགས་དགོངས་རེད།།</p><p class="ql-block">གནས་ལྕང་ལོ་ཅན་གྱི་གཞལ་ཡས་ནས།།</p><p class="ql-block">དཔལ་གསང་བདག་མི་ཡིས་གར་མཛད་པ།།</p><p class="ql-block">རྗེ་བླ་མའི་ཚུལ་གྱི་གནས་འདིར་ཕེབས།།</p><p class="ql-block">ངེད་ཆས་པའི་འབངས་ཀྱི་སྐྱབས་མགོན་རེད།།</p><p class="ql-block">དགུང་སྐར་ཚོགས་ས་ལ་ཕེབས་འདྲ་བོ།།</p><p class="ql-block">དགོན་མ་ལག་བརྒྱ་ཡི་བུ་དགོན་དེར།།</p><p class="ql-block">ཡུལ་མདོ་སྨད་ཆས་པའི་ཆོས་སྡེ་ཆེ།།</p><p class="ql-block">འབངས་མི་སེར་ཡོངས་ཀྱི་ཞིང་ས་རེད།།</p><p class="ql-block">གནས་རྒྱབ་རི་རིགས་གསུམ་མགོན་པོ་འཛོམས།།</p><p class="ql-block">མདུན་རྒྱལ་སྲིད་སྣ་བདུན་ཚང་བའི་ཡུལ།།</p><p class="ql-block">ཆུ་ཡན་ལག་བརྒྱད་ལྡན་དྭངས་ཤིང་བསིལ།།</p><p class="ql-block">ས་ཡར་འགག་མར་འགག་འཛོམས་གནས་རེད།།</p><p class="ql-block">བྲག་རང་བྱུང་ནོར་བུའི་ཕོ་བྲང་ན།།</p><p class="ql-block">འབྲོང་དར་མ་རྒོད་པོ་ཆིབས་སུ་བཅིབས།།</p><p class="ql-block">གཉན་དཔལ་བྱིན་དབང་གི་རྒྱལ་བོ་དེར།།</p><p class="ql-block">ཡུལ་ཆས་པའི་ཡུལ་ལྷ་དཔལ་རྒན་རེད།།</p><p class="ql-block">ཆོས་དཔལ་ཞིང་བཀྲ་ཤིས་ཆོས་འཁོར་གླིང་གི་ཚོགས་ཆེན་འདུ་ཁང་ལེགས་འགྲུབ་མཛད་སྒོའི་ཤིས་ཚིག་དབྱངས་ཀྱི་མཆོད་པ་ཞེས་པ་འདིར་འབྲས་ལྡན་སྤྲིན་བཟང་ཟླ་བའི་དམར་ཕྱོགས་སྟོང་པ་དང་པོ་ཉིན་ལ་ཅོ་ཚེ་གྲུབ་ཏུ་འབོད་པས་ཤར་མར་བྲིས།</p>