散文:怀念颛桥小馄饨

福全

<p class="ql-block">作者:阿杜</p> <p class="ql-block">春节后我去秀龙居委参加“相约星期二”个老年人活动,搿趟伊拉聊到了颛桥小馄饨。</p><p class="ql-block">馄饨作为中华传统小食,勒历史文献当中早就有记载。西汉杨雄所著《方言》中提及“饼谓之饨”,三国时期魏国张揖所著《广雅》中记有“馄饨,饼也”。可见,“馄饨”个称呼至少勒东汉末年已经出现。</p><p class="ql-block">北齐辰光,儒学家颜之推提及:“今之馄饨,形如偃月,天下通食也。”搿意味着,当时个“饺子”搭“馄饨”已有实质性区别。不过,古代人老少提到“小馄饨”。直到清代,袁枚《随园食单》中再谈到小馄饨:“小如龙眼,用鸡汤下之。”搿里讲个可能是淮扬点心当中个小馄饨,肉馅头要加进去酱油唠啥调料。</p><p class="ql-block">上海个小馄饨要更加清爽一眼。勒老城区成长个上海人,应该侪有吃小馄饨夜宵个经历。夜深了,点心店基本打烊了,勒街角搭弄堂口,摊档浪烧着一锅子水,各种碗、调羹、调料各就其位,摊头旁边摆好矮桌搭长凳;点好只数个小馄饨勒开水里上下欢腾,柴火微微地发出声响,有星星点点个火星溅出炉子,远远较就可以看到,搿光温暖着夜归人个心,一碗“柴爿馄饨”垫暖了夜归人个肚皮。</p><p class="ql-block">馄饨下好装勒加了各种调料个汤碗里,最后淋上眼香油,香气飘满整条弄堂。“柴爿馄饨”个得名,应该就来自于伊个声声作响个柴火。“柴爿”是经过劈截个小段柴薪,便于携带,常常用勒移动摊档处。</p><p class="ql-block">沈嘉禄勒《老上海美食》当中搿能写:“其实上海人对馄饨个想念,多半是冲着小馄饨而来。大馄饨虽然也勿错,但一般当饭吃,解解馋还是要数小馄饨……·皮子是手工擀个,皮子薄得来像半透明一样,摆到报纸浪还可以看清下头个铅字,划一根火柴可以拿皮子点炀。以搿能样子个皮子裹肉馅,里向留一眼眼虚空,可以看到淡红色个馅头心,交关可爱。入锅后一歇歇就捞起来盛勒汤碗里,而搿碗汤是大有讲究个,用肉骨头吊出来个汤清清爽爽,看勿出肉渣骨屑,喝一口汤,摸摸额骨头,鲜得来眉毛还了嗨伐?”</p><p class="ql-block">除脱路边摊档,吃客到餐饮店里也常庄是一客生煎、一二两锅贴,再配一碗小馄饨当汤,干湿搭配,交关适宜。一般来讲,小馄饨里是没菜肉馅个,以纯肉为主,最多加眼斩碎个虾仁。肉馅头基本黄豆大小一眼,用竹片头往皮子里一挑,再手一捏,前后不过两秒钟,一只小馄饨就包好了。吃个辰光,伊眼肉鲜只勒舌尖浪轻轻滑过就进肚皮里了,真是令人回味。</p> <p class="ql-block">上海人,特别是上了眼年纪个,大多数是勒弄堂里成长,吃着小馄饨长大。伊拉个血液里流淌着类似个气质——安分知足又有生活情趣,市井随性却勿傲娇勿张扬。就像用心做好一碗小馄饨伊能,自立本分是上海人个一种态度。就迭个来讲,小馄饨搿能个传统小食,渗透着满满个上海味道搭暖暖个回忆。伊满足个勿仅是味蕾,还有情怀搭气质。</p><p class="ql-block">颛桥搿个古镇个点心里向,小馄饨是佼佼者,颛桥西街马引娣师傅做个小馄饨就是名牌点心,伊丈夫个店里,公私合营后勒南街口个点心店里,还有勒“为民点心店”里向,伊个小馄饨是要排长队来买个,我搭马师傅共事过一段辰光,来吃个人勿断。我跟牢马师傅学了老长时辰光也学勿会,而汪永兴一会就学会了,捏出来有模有样,下出来也好吃,马师傅个徒弟汤菊花做个也赞个,看来,伊是取了真经个。</p><p class="ql-block">有趟初中同学聚会,看到了马师傅个囡圄,伊讲到颛桥小馄饨个伊个馅头,伊个鲜汤,是伊拉姆妈按一定比例配制个,可惜,囡圄也没取着真经。</p><p class="ql-block">现在街浪上老多个点心店,卖个基本大馄饨为主,即使有个标榜是小馄饨,也勿是以前吃过个伊个小馄饨味道。千里香吃了也没觉着哪能香,我还是想着回味无穷个颛桥小馄饨。</p>