～～老浜瓜～～

haining

　　虽然呒没封城，但勒小区里“静默”了两个月也是蛮憋屈咯！这几天刚刚可以“活络”，急煞勿煞做了两桩事体：一是，到上海著名景点兜了一圈，领领市面。有几个地方，讲老实闲话，假使呒没封禁，我是好几年勿去了；二是，“偷偷”跑到朋友别墅里去聚会，咪点小老酒，据说奥密克戎怕酒精。

阿拉这眼老朋友座勒一道，两个多月呒没剃头，蓬头垢面，白发苍苍，年轻人看见，客气一点称之为“老爷叔”，直白一点就是“这帮老头”。伊拉勿晓得，老早阿拉自嘲是叫“老浜”，背后拨人家骂一句是“老浜瓜”。当然老浜、老头浜，侪是从老浜瓜引申出来的。老爷叔长面孔，再剃只光啷头，活脱似像一只“三林塘老浜瓜”。

五十多年前咯大热天，上海人经常吃浜瓜。浜瓜有两种，上海三林塘浜瓜脱仔湖州崩瓜，两只品种外形蛮像，而且西瓜皮，外绿内白，釀黄，籽黑，甜度高。三林塘浜瓜长幺幺，两头尖，纹路浅；湖州崩瓜大一眼，两头圆，纹路深。浜瓜买回来，轻轻放勒网线袋吊到井水里，夜饭喫好乘风凉咯辰光喫，味道好勒勿得了！

虽然上海闲话里“浜”，“崩”勿分，其实这两个字用起来还是有区别咯。“浜”意思比较明确，“河浜”、“拷浜”等，侪搭水有关，就是“浜瓜”也是因为西瓜靠河浜运输而得名，浏河附近有条水路就叫“浜瓜泾”。“崩”就勿一样了，除原意外，上海人打相打敲破了头，就叫乃人家咯头崩忒了。

网浪相查到《上海蔬菜种类的栽培技术研究》1994年第一版里有一段描述：“三林崩瓜，通称三林浜瓜，因皮薄易裂，故名崩瓜。由于上海方言中，崩与浜同音，崩瓜也为浜瓜，古称崩瓜。”勿管是三林浜瓜（崩瓜），还是湖州崩瓜，埃歇辰光阿拉侪叫浜瓜，勒这搭浜与崩是混用咯！

去年一年，屋里两位长辈相继离世，本是非常悲痛之事，如今想来确是幸运，这类事情如果发生在封控期间真是悲惨至极。长辈离去，空位子我坐上去，突然觉着自己老了，似乎人侪是一瞬间变老咯。我从小以为只有外公是老人，我从来不会乃自己咯生命与一个“老”字加勒一道，从来呒没顾及过，有朝一日从镜子里照出来也是一个老头浜。如今只有拼凑起生活碎片，思考生命中的归去来兮！

如今有了老头浜腔调，刚刚开始相信，生命本身就是一程岁月，一路光阴。无论是青年时代不知疲倦，还是中年时期满是疲惫，都不曾预料，只要静默两个多月就可以乃一个刚刚六十出头咯人，变成地地道道咯老浜瓜。生命只不过是一场游戏，一场只能享受过程，无法预见结果咯游戏。勒老浜瓜眼里，人生绝不是可以随意主宰或随意摆布咯，阳光灿烂、红尘浪漫经不起敲敲打打。天底下没有不会老去咯生命，老是生命咯回归，正如花开花谢，秋去冬来，一切侪是随着一种规则，相互地交替和演变的。

小赤佬变成了阿毛拉爷，慢慢又多出来几个爹爹、阿爷……突然间，热闹咯马路撳下了暂停键，浑浑噩噩与缤纷多彩，化成了几个月里咯云烟风雨，留给大家刻骨铭心咯记忆！

其实老浜瓜从内心来讲是勿服帖咯！