《画家笔下的上海记忆》61-新场第一茶楼

姚志伟

　　电影《色戒》放了之后，浦东南汇新场古镇额名气开始响起来了。其实“十三牌楼九环龙，小小新场赛苏州”，新场名气老早就有了，只是交通勿便当，去额人也就一直不多。

勿过也好，新场古镇现在还是保持了老底子额样子。青石板铺成额路面，拨几代人走了呒么了棱角，老街两旁边一幢幢明清建筑，奇檐斗拱历经风雨缺了不少尖尖角角，白墙青砖斑斑驳驳多了一些岁月痕迹，江南古镇独有额味道浓是浓得来。街面交关店面，辣门口挑起一道道五颜六色额布帘，像古代招牌，随了轻风细雨飘法飘法，吸引了不少眼球，勿过看上去有点怪，现在闲话讲叫做穿越。河浜边浪厢还是住了不少人家，“家家有水，户户养花”，保留了水乡额传统文化。

古镇最闹猛额是洪福桥，桥边浪有只百年茶园，是清朝同治末年造额，二十世纪二十年代又翻建为三层楼，砖木结构，四坡顶，二、三层连排玻璃窗，五梁架。格辰光是新场镇最高建筑，所以称为“新场第一楼”。上世纪三十年代起开设书场，镇浪厢额人去听听书，吃吃茶，小日脚过过，蛮适意额。格只茶楼勒1940到1943年曾经还是中共上海地下党联络点，据说老一辈革命家陈云当时多次到格只茶楼来布置工作。

我去新场是辣嗨李安导演拍电影《色戒》之后。因为《色戒》勒轧面拍了点镜头，所以新场奈广告做了老大，吸引了不少人过去。我顺带便到古镇边浪厢去看一看大东方画家村倒底是哪能介样子。看了一圈，讲老实闲话，大东方画家村只勿过是房地产商做额噱头，呒么花头额，房地产上去了，画家赶出去了，又勿晓要到鞋里搭去落脚了。

古镇是蛮好白相额，勿比附近格点水乡推板。印象特别深额是：格天我从老街一路东张西望走进去，大约模兜了半个钟头枉里，突然之间眼前一亮，前头好像一片金色光芒，感觉像佛光升起来照亮了前路，心情莫名激动起来，快步走过去看看清爽。原来轧搭有个南山禅寺，寺庙边浪厢用黄颜色额竹头扎成一面篱笆墙，阳光照辣上头，远看就是金色光芒一片了。