《画家笔下的上海记忆》59-田子坊

姚志伟

　　1999年，陈逸飞、尔冬强等有名气额艺术家看中了泰康路210弄，利用格搭额废弃小仓库、里弄生产组等老房子，各显神通，改造成了蛮有腔调额创意艺术工作室。

扎记名气响了，一下子传开了。一些老外经常来兜一兜荡一荡，角十石库门弄堂有历史又有艺术，白相起来蛮有味道额。至于是甜米味还是咸米味，自家晓得。

2001年，画家黄永玉来上海到陈逸飞工作室去白相，老酒一吃兴致老高，就为扎搭块弄堂起了只名字叫“田子坊”。格个名字有典故额，《史记》当中讲到，阿拉古代最长寿额画家叫田子方，“田子坊”用此谐音，并辣了“方”字旁边加个“土”，意思就是轧答为文人、画家、设计师个土壤。

我第一趟去田子坊是一帮朋友一道去额，格辰光辣嗨田子坊对过，有家茶馆店，店主人姓汤，是朋友额朋友。格只茶馆店布置得来蛮有味道，里厢石桌石凳，像世外桃源一样，客人进去除了吃茶嗄山胡，还可以执象棋围棋五子棋，连军棋四国大战也可以，当时电影演员林栋甫就经常去搿嗰茶馆店里白相。老板汤先生好客，拿出黄永玉题字额酒鬼酒让阿拉品尝，一杯白酒吃下去，闲话就开始多起来了，讲起田子坊呃来历，讲起陈逸飞尔东强额工作室，又讲起借房子要多少钞票等等，反正无轨电车乱开。记得一道去额一个台湾朋友讲了一只笑话，伊讲当年唐伯虎去朋友屋里厢拜访，酒足饭饱之后，主人求墨宝留作纪念，唐伯虎乘了酒兴奈起毛笔，砚台浪沾点浓墨又沾点水，辣嗨宣纸浪飞舞起来，最后唐伯虎居然奈裤子一脱，朝墨水浪坐一记，再朝宣纸上坐一记，大功告成。一幅活色生香额花鸟画栩栩如生。立勒边浪厢额佣人倒蛮聪明呃，伊等生活做好后回到自己房间里，照式照样来一遍，不过横看竖看就是不像，总归缺少点啥么事，伊实在弄不懂了。大家听了格只故事哈哈大笑。 又过了几年，我也辣嗨田子坊5号画家楼借了间房间做了油画工作室。但是没过多少辰光，觉得勿大对头。田子坊名气越大，画家楼人越少。原来人家是来白相石库门弄堂额，看看风情，买点礼品，吃杯咖啡，到画室只是来参观或者是来驳样，涨点知识，啥人来买侬艺术品。难板碰着几个外国人，冂槛也精得来勿得了，洋葱头一个也没斩到过。每天接待游客，介绍勒牢起劲，最后一句“康拜克”回答侬。好不容易卖塔二张，又到了房东额袋袋里去了，又忙又赚勿着钞票，连画图也心思不定。眼看苗头不对，三十六计，走为上计。格辰光，田子坊房源比较紧张，外头要进来比里头要出来额人要多，有点像《围城》里厢呃感觉。外面人想进去，里面人想出来，所以转让非常容易。

勿过凭良心讲，去田子坊白相相还是蛮灵额，每间门面各有特色，学习创意设计是免费额，不要钞票，只要做个有心人。格嗰社会只是对艺术家和原创作品有点不公平，艺术名气一打响，生意人立马跟进，房东川剧变脸，租金马上上涨，黄永玉写的“坊”字含意没了。后来，陈逸飞早逝，尔东强迁出，大部分艺术家退出，现在额田子坊，只是一个旅游景点，是喜是忧全凭各人理解了。只能感叹一句：“格个世界真咯看不懂”