《画家笔下的上海记忆》57-尚贤坊

姚志伟

　　现在人对尚贤坊勿大哓得，其实尚贤坊就勒嗨淮海中路k11旁边，当中隔了一条淡水路。尚贤坊是上海有名呃老式石库门弄堂，格条弄堂建造于1921年，相当有“海派文化”呃味道。

所谓海派文化，其实就是中西合璧。侬看，过街骑楼，黑漆大门，机红砖，清水墙，内有天井，楼高两层，是典型呃老式石库门；侬再看，房子立面是西班牙巴洛克风格，房子周边配有西洋浮雕装饰，明显受到欧洲建筑风格影响，现在讲起来格个叫作“混搭”。

勒嗨靠近霞飞路（现在叫淮海路）底层呃门面房子全部是店铺，卖呃当然是时髦货。老底子尚贤坊住呃宁以小商人、教师、作家居多，著名作家郁达夫勒嗨格条弄堂里有过一段浪漫故事，伊自家呒么住了尚贤坊，但是因为有个好朋友孙百刚住勒嗨，所以伊经常去尚贤坊访友，住了同一幢石库门里厢呃其他文化人听到郁达夫来了，也常常会一道过来聚会嘎山胡。

1927年1月呃一个礼拜五，郁达夫到尚贤坊40号 去探望孙百刚，刚走进石库门，勒嗨楼梯朗偶遇一位风姿绰约呃年轻女郎，郁看了第一眼心就扑扑跳。通过朋友认得了之后，郁达夫发痴了，三日两头就要到40号来，但不是寻朋友聊天，而是来看格位杭州来的大家闺秀王映霞。二十岁个王映霞天生丽质，就住勒孙家的二楼亭子间里。郁达夫对她是一见钟情、一往情深，王映霞汤否牢伊呃花功，同时也吃塞郁达夫呃才气，由此一场轰轰烈烈呃爱情剧开始了。

虽然格辰光，郁达夫已经结婚，但还是与王映霞轧朋友，经过种种波折，最后两个人勒嗨上海结婚了。尚贤坊是上海石库门弄堂代表作，也因为有郁达夫呃浪漫故事更加出名了。 当然，石库门弄堂里故事交交关关，但能够流传下来有讲头呃，也只是老百姓愿意记得好白相呃事体了。