《画家笔下的上海记忆》56-逝去的大中里

姚志伟

　　上海石库门额房子，一部分有代表性额保留了下来，其它么，差不多被地产商分光拆光了，剩下来额边角料没人接盘，要拆也拆不特，里厢头还是老底子额居住水平，卫生条件只要看看弄堂口额化粪池就晓得了，地方条件摆设勒嗨额，要改造也难，啥人出钞票，倷讲奈能办。

只有等上海滩有啥大型活动了，奈么靠马路一面额墙壁浪塗脂抹粉来一记，就像老太婆塔胭脂粉，摆摆码相，好坏不怪。经济条件好点额人搬出去住，条件差额么只好七十二家房客了。

我讲大中里拆特是幸运额，不过住勒里厢额人感情浪有点舍勿得，老房子呒没了，根也没了。格辰光，大中里有个朋友拍了一个纪录片《乡愁》，回忆大中里额生活，总算解了居民额思乡之情。我格嗰辰光也带了国际学堂额学生去大中里拍了一组《过去，现在，将来》额摄影，学生作为作业交上去，得了个A加。拍照嗰辰光，只看到格点拆迁额人立了墙头浪厢倷大榔头起起落落，倒也不怕自家人掼下来。

低矮破旧的“大中里”辣嗨当时做啥介引人注意奈？一是地段好，上海电视台边浪厢，正宗市中心；二是大，从威海卫路石门一路一直要到南京西路，介大一块地方，主要就是大中里额地盘，另外还有一点其它额小弄堂；三是人多，大中里是1925年造额，还没拆特呃辰光是上海市里厢保存勒最完整、规模最大个石库门里弄之一。轧答有1600多户居民，一直保留了最初额石库门生活状态。

另外，大中里原来是一个英国地产商设计建造额，所以格片石库门里弄也因此拥有了西式风格额雕花门楣、联排别墅式额布局，每一栋石库门侪是传统江南民居额翻版：天井、前后客堂、前后厢房、亭子间和晒台。

到上世纪后期，弄堂里额生态变得越来越多种多样：主弄堂南北走向，每天有较关蔬菜摊、鸡蛋摊、肉摊、水产摊等，不过侪是呒证额摊头，还有卖早点心额，卫生许可证也呒么格，侬想，弄堂里厢个小生意，啥人会去办证呢，就是要办证也勿可能办得出呃。摆摊头额人赚点小钞票过过日脚，居民也方便，大家实实惠惠省两钿就可以了。弄堂里居民额素质也是各式各样，侬早浪厢走进弄堂里去看：蓬头散发额女人穿了睏衣，眼晴还没全部张开就端着痰盂罐朝化粪池走，男人家么叼了根香烟朝小便池去，至于马桶拎出来额事体，辣嗨图清老早天还呒么亮额辰光就演出过了。还有要赶了上班之前挑菜买肉呃人，买早点吃馄饨额老面孔，人来人往，活色生香，每天上演一场最原汁原味额上海石库门风情剧。

石库门房子越拆越少，石库门居民各奔东西，石库门文化随风而去，石库门建筑所代表额上海历史和文化，或许再也回勿到本来额样子。为了纪念格一切，我创作了一张油画：《逝去的大中里》。