《画家笔下的上海记忆》54-步高里

姚志伟

　　老上海法租界，有不少相当有年头额石库门弄堂，自然也就有不少故事了。画中额步高里，建成于1930年，勒嗨现在陕西南路和建国西路额交界地方，可以算得上是上海石库门建筑额代表作之一。弄堂口中法双语额中式牌楼、弄堂内中西融合额建筑风格，暗示了步高里有讲不光额故事。

20世纪40年代末，木心先生因为养病而寄宿勒步高里15号。平常辰光，伊从步高里出来，沿建国西路(福履理路)朝东走到思南路(马斯南路)，再往北走到复兴路(白赛仲路)，到了伊自己斜气欢喜额“贝多芬书店”里厢，慢慢看慢慢淘，寻到一些看得中额唱片与书籍就买下来，当作宝一样包好，然后心满意足，慢慢散步走回步高里。前后将近有一年半额辰光，步高里静静个记录下了木心先生额生活足迹。

除了木心，著名作家巴金先生也曾经勒嗨步高里52号居住过，不过搿是1934年额事体了。老底子步高里弄堂静悠悠，大家门口坛坛罐罐侪是种点花花草草，从来呒么杂七杂八的么事堆出来，环境安静斯文，空气当中好像还有一丝丝法兰西额浪漫味道，巴金先生就是勒嗨步高里创作了《海的梦》等作品。

大半个世纪过去了，物是人非，现在步高里额老居民是越来越少了，走特呃走特，搬特呃搬特，较关人倷房子租百外地人或者外国人。其实，步高里也像是一个围城，老居民觉得住了不适意要搬出去，但是伊额历史底蕴和独特风情，对老外或者对海派历史文化有兴趣额人相当有吸引力，所以，外头额人倒是经常性寻中介准备搬进来蹲一腔，还有一种人是跟了中介进来参观参观额，轧记门槛精呃。