《画家笔下的上海记忆》48-清末南京路

姚志伟

　　英租界，早期额南京路是一条中国式额马路，以河南路为分界，马路东段近外滩额大楼建筑侪是西式风格呃，而马路西段，大多数是两三层中式楼房，有南货店，绸缎店，药材店，银楼等，经营各地方呃土特产。

画面浪，小宝娘背着小囡来到南京路，东张张西望望，像红楼梦里额刘姥姥走进了大观园，眼花缭乱，谷实轧答额地方花头经老透，弗晓得朝鞋里答走好。

大清老早，店铺还没开门，马路上人不多，三三俩俩，路当中，只有黄包车夫拉了一个好像是清朝遗老额人，脚翘黄天包，当伊是观光车，朝两旁边看野眼，边浪厢当差额人推着一部脚踏车跟了嗨，格辰光额脚踏车就相当于现在额法拉利轿车，是有铜钿人白相额。

小宝娘上个号头刚从宁波乘大轮船到上海，从十六铺上来，男人来接伊，住勒南市油车码头附近。当时清末上海滩以洋泾浜为界线，南面叫南市，老城厢为主，北面就叫北市，外国人额租界为主。

辣嗨南市住了一个多号头，城里厢侪兜过了。小宝娘年纪轻，心思活，脚头鞋比较散，听说北市有洋人洋货，想开开眼界，就作天作地要出来。男人做生意么空陪伊，就拨伊点铜钿，让伊带了小宝去白相。

从油车码头出来，辣老城厢里七兜八弯，到了老北门，出了南市。过了洋泾桥，黄包车一长条排了嗨。小宝娘喊了一部黄包车坐上去，叫车夫去北市南京路兜一圈。从五马路(广东路)到四马路(福州路)，三马路(汉口路)，二马路(九江路)，来到了大马路(南京路)。下车付了铜钿，先朝东走，只看到东面高楼交关，底楼门面橱窗里咯洋货花里百拉，看了眼晴也花特了，高鼻头洋人对伊叽里咕噜，弗晓得讲啥么事，鸡对鸭讲，勿没劲。回转身，还是走到西面，中式商铺熟悉，有邵万生南货店，老凤祥裕记银楼，还有茶楼等，只是人生地不熟，不敢走远，只有张大了眼晴看新奇，奈么到沙地方去……？啥宁穿越一下，帮伊出个主意，不过，勿要动坏脑筋噢。